新手養水龜前應要知道GE知識～
由於小弟家居問題要由水龜轉去陸龜界～想分享下呢年幾兩年養龜所學到GE野～希望此帖幫到新手及列入精華～XD～會加D比較具體做法～例如幾耐換水～餵食份量～器材推介及價錢等等～
PART 1：態度（最重要）
1）水龜成體SIZE：一開始當然要分享養水龜應有態度～唔好以為係魚街見到D龜B細細隻好得意～一堆係個小浮台上好震撼咁～事實上不出一年～你會發覺小浮台根本冇位比咁多龜玩層層叠～到時又放生又賣龜～煩GE只係你自己～唔捨得但屋企細～呢D情況一定係新手上發生過唔少次～所以買龜前～你要由佢地GE成體SIZE開始諗～約1～2年會變成亞成體（成體龜GE一半SIZE）～3～7年變成成體～資料睇下條LINK～有介紹各陸水箱龜GE特質同成體SIZE～
http://www.herpera.com/PetEra.htm
2）水龜品種：如果怕死龜～買平價巴西龜養住先～（好似除左變巴同金巴...隻隻都係平價=.=")養定左先買其他龜～呢個心態其實唔好～你只係當巴西龜係實驗品～到時為左入新龜而送龜～冇人收隻龜時煩GE又係你自己～所以養之前～諗下自己財政同喜好揀龜～係論壇同圖書館做好RESEARCH再養～即使你第一隻龜係過千～你都會養得佢好～
比較岩新手養GE水龜：巴西～地圖～油彩～刀旦～黑旦～忍者～揀龜要睇鼻有冇流水～指甲是否齊全～皮膚同甲殼有冇受傷～尾端有冇斷GE現象～
3）器材價錢方面：如果你以為可以用平過龜本身GE價錢買到足夠器材去養好一隻龜～咁大錯特錯～當然～有部份龜友只係用個盤＋水～每日換水隻龜都養左幾年都冇死～我只可以講～唔死龜唔代表係養好隻龜～如果真係想養好隻龜～對龜好～你會發覺器材方面唔會平得去邊～要有心理準備～器材約500～2000到～每年要換某D器材約300～1000到～有貴有平～下面個幾PART會介紹下～
PART 2：器材～
4）買龜前應先買器材：因為執個靚場同養水等要時間～如果同時間買返來GE話～你SET場期間隻龜要等你～對佢來講唔係件好事～唔建議用小型膠缸養水龜～指甲會刮花缸邊～（所以IKEA大膠箱係OK）～玻璃缸比較好～
5）主要水龜器材有：濾水器（PART 3會講），燈具，浮台，暖管，小擺設，溫度計X2
6）燈具：
選擇1：龜之所以要哂太陽～係因為需要UVB光線（人睇唔到）去吸收鈣＋維他命D3～而呢個過程需要熱去進行～簡單來講～每日比龜直接哂太陽30分鐘至1個鐘係最好（要冇玻璃阻住）～而哂GE期間要比陰暗處以防太熱隻龜識搵位抖暑～水溫最高到32度乜都夠～過32度就唔好比佢哂～陰暗處都32度又點抖暑呢～？太陽有齊UVA＋UVB＋全光譜（唔明GE話當係有齊所有顏色）等～係最好選擇～但要記得有陰暗處～
選擇2：如果冇位哂太陽～咁就要買燈～雖然水龜糧有足夠鈣同D3～但有UVB燈會提供比較好GE環境比佢～市面上UVB燈冇加熱功能～所以要買一個熱膽（最好有UVA～係龜睇到而我地睇唔到GE光線～令佢環境比較貼近大自然）～而UVB燈加燈罩（入面要銀色～白色冇用）能有助發揮UVB效果～燈罩應該以垂直角度照射龜龜～ZOOMED UVB10.0係唔錯GE UVB燈～HKD230到～ZOOMED燈罩（細）約HKD200～ZOOMED燈罩DEEP DOME型（FOR UVB燈）～HKD250
選擇3：買一個太陽燈～好處係UVA＋UVB＋熱～但冇全光譜～市面上冇一個膽有齊太陽GE效果～怕兩個膽麻煩GE就可以買太陽燈～MEGA RAY 100W太陽燈暫時係最好～HK冇得買～論壇有時會有人放～（HKD約600～700）～其他係ZOOMED POWERSUN 100W夠用～160W會太熱（雖然多D UVB，太熱只會令龜避你呢個膽～HKD400到）～
7）浮台：目的比龜隻“全身”上陸地用～可以哂乾身～如果用其他擺設有陸地比龜都可～ZOOMED磁石浮台幾好用～（M SIZE）約HKD130
8）暖管：冬天保溫用～建議調較到20～24度～令龜龜知道天氣比夏天有所分別～HYDOR牌幾好用～25W～約HKD120
9）小擺設：除左裝飾～小擺設主要目的比龜有淺水區～作為淒息訓覺用～用之前最好浸一晚水先用～
10）溫度計X2：一個CHECK水溫（夏天：26～32度，冬天：20～26度）～一個CHECK陸地溫度（夏天：30～35度，冬天：26～30度）～溫差最好約7度到～等龜知道陸地有太陽哂～溫差太少龜好少上岸～
PART 3：水
11）水深：在乎咩種～成體龜呢方面唔係大問題～幼龜如果游水唔叻（例如草龜）～最多係龜高3～4倍～太深有時D龜唔識上水抖氣～佢地係用肺～唔係腮呼吸～唔好當係魚咁～
12）水質及濾水器：要睇龜缸SIZE同濾水器決定幾耐用一次水～濾水器有幾種～個人認為岩水龜用GE係潛濾同濾桶～潛濾價錢平，但主要吸排泄物（唔係分解排泄物）用～分解能力方面較弱～濾桶比較貴～但吸同分解排泄物會比較好～分解排泄物主要由硝化菌分解～由排泄物（毒素之一）分解成無咁毒GE毒素～所以即使用濾桶～都要定期換水～每日換約1/5GE水量～每個月換成缸水就OK～如果見排泄物就撈起～可以耐D先換水～潛濾就要密D～每日換1/3水～每3日換成缸水～硝化菌詳細解釋可以去水龜精華文章了解下～
http://www.hkturtle.org/forum.ph ... &extra=page%3D1
＊＊記住要用隔夜水（放一盤水～等24小時到先用～用之前聞下有冇氯氣～目的係等水GE氯氣消失～否則死龜機會大增）
PART 4：餵食
13）牌子：市面好多不知名龜糧～個人認為MAZURI，NUTRAFIN MAX，ZOOMED水龜糧都OK～其他牌子我未用過～久唔久可以餵下蝦干，豐年蝦，魚仔作為小食～多元化龜糧及小食係對龜好～但幼龜唔好餵太多生野～可能有菌同增加佢地攻擊性行為～成體建議餵少D糧～可以為下D菜同水果～最好去陸龜區睇菜果資料～
http://www.hkturtle.org/forum.ph ... &extra=page%3D1
14）餵食份量：宗旨～寧少勿多～龜多數飽死～極少係餓死～佢地一見野就食～太飽對腸胃唔好～個人認為每日餵龜頭一半GE SIZE到～以幼龜餵ZOOMED幼龜糧為例～多收我餵10粒到～
新手常見問題：
15）龜成日上岸抖大氣～成日打開口～唔落水～唔食野～點算好？
答：多數係肺炎～成日多數係凍親～自然方法係要乾養約24小時加溫至30～32度（某D龜唔可以咁耐，例如飛河龜等水性較強GE龜）再唔WORK再POST講情況～乾養後放落水時水溫最好有27～28度～太凍只會惡化～
16）混養可以嗎？
答：其實每隻龜都有唔同性格～同品種都可以唔同性格～甚至有好大分別～呢個問題冇話YES OR NO～只在乎你D龜GE性格～但個人唔建議用“博”GE心態去買隻龜來混養～都係個句～到時唔夾煩GE係你自己～
17）龜會聽到我講野～認得人嗎？
龜冇耳殼但有耳～可惜能力比較弱～多數感覺到震而唔係好清楚咁聽到人類講GE字～有D CHING話蛇頸龜會比較大機會認得人～其他龜分別人類之間GE唔同特徵應該較難～
18）缸SETTING方面～除左深淺水區＋陸地外～可以加底材嗎～？
答：強烈唔建議～龜會因底材太細而誤食～未必能排泄出來～只會卡住係腸～有嚴重影響～更會影響水質～因為龜排泄比魚同蝦多好多～濾水器入面GE硝化菌未能完全分解排泄物～而且底材會令濾水器吸唔走D排泄物～水質會唔穩定～
19）格仔版好用嗎？
答：個人建議亞成體及成體龜先用～幼龜有時可能想抖氣～頭穿過格仔版但殼穿唔到～好易抖氣變左吸水～水腫機會增加～
20）點知水質O唔OK？
答：可以買D魚仔放係缸到～用魚GE分娩缸養～防比龜食～魚比龜相對對水質敏感～如果魚有事～水質可能有問題了～
以上係小弟GE經驗～可能會有錯或者資料唔齊～望CHING們多多指點～令新手們享受養龜樂趣而唔係唔知頭唔知路咁養～
PS：多數SALES講GE～得30﹪可信～爬文比聽SALES講GE好幾倍～新手多爬文吧～
評分
參與人數 12威望 +22
收起
理由
cys487980
+ 1
終於可加分給你了
thomas2835
+ 1
認真!!
AL0v0
+ 1
多謝分享
大頭蝦
+ 1
支持...!
ashbone
+ 2
熱心幫助
jimmysiau
+ 1
hobillgo
+ 1
原創內容
eGG
+ 1
thz！share
鬼仔
+ 1
多謝分享
蛇頸之友
+ 1
多謝分享
brianlam314
+ 1
多謝分享
ak-ding
+ 10
多謝分享
查看全部評分